一直很抗拒金生的作品,無論是小說,電影,電視.
原因是小時候(應該是小學三年級之前)在明珠台看過史提芬.金的電視片集(當然唔係金生自己拍啦,都係改篇既多),恐佈異常,小弟屬於十分無膽之人,到現在睇完恐佈片都係會夜晚瞓唔著個隻.
自此一直將這位大師拒諸門外,不曾再會.

今次居然主動去買呢本書,完全係說書大兄既介紹,故事簡介一睇就覺得同早幾年既電影28日後如出一徹,就等我睇睇大師寫出黎有何不同.

花了兩日時間,看畢全書,大師真不愧大師,全程真係睇到放唔到手,劇情緊湊,每每出人意表.

故事真的有點似28日後,人類受感染,狂性大發只懂殺戮,主角們差不多無還手之力,一路打打逃逃,雖然好似一般喪屍片,但係總覺得比喪屍片好睇得多.

手機更吸引的地方是,沒有前因,沒有結果,事件突如其來的發生,全書就好似一個鏡頭一直拍落去,一直緊跟著主角經歷一切,讀者所知的就如主角一樣,充滿無耐,充滿真實,更加容易代入,結局的留白,有點老套,有點估你唔到.