今日終於過大禮喇~~~~~~~~


7點就要起身準備, 尋晚唔知係咪緊張得滯, 加上行雷閃電, 成晚都訓得唔好, 攪到今朝好攰! 

8點鐘老公準時同訂過大禮個間公司係我屋企樓下交收, 真係幾好服務, 又唔係貴, 又肯送貨, 真係值得推介! 之後老公就打俾我, 叫我拎d海味, 生果籃出去俾佢拎入我屋. 佢拎完就返左工喇! 由佢2個姨負責同我屋企人點收, 需時大概15-20分鐘, 我就同小豬係房, 冇得出去! 到佢地走左喇, 我就可以出去..........不過婆婆話叫我唔好摸任何野, 哈哈, 我可以翹埋雙手睇佢地做呢樣, 做個樣, 又唔會俾人鬧我唔幫手喇! 拜完神之後就食餅時間, 不過婆婆話今日我冇份食! oh......等左一陣就去飲茶喇. 

今日阿媽叫左好多親戚入來拎帖, 所以飲左3個鐘頭茶. 之後我就去左開枱, 呵呵, 打左半日係完全冇斬獲, 不過就唔洗輸喎, 算執返身彩呀! 再來就係食飯, 估唔到哥哥都入來食喎, 初時仲以為聽錯添!

食到10點d人就散水喇, 辛苦左一排既過大禮終於都告一段落喇. 下次再會令我傷腦筋既就係big date, 距離既日子一日比一日近, 而家好心急, 唔知到時會係點呢!?